Ramkomh Cozah nih COVID-19 lockdown ruang ah nifatin tangka luut a ngei lo mi hna bawmhnak pek ding le electric mei man unit 150 tang a hmang mi April thla ca pek lo ding ti mi cu kan tawlrel cuahmah ko, tiah Minister Pu Soe Htet nih April 13 ah a chim.
“Nifatin tangka luut a ngei lo mi zong April 10 thok in bawmhnak kan pek hna lio a si. Cun, April thla chung ah mei hi unit 150 tang lawng a hmang mi mei man pek lo ding zong kan tawlrel cuahmah ko,” tiah Sipin le Electric Minister Pu Soe Htet nih The Hakha Post ah a chim.
Hi kong ah Hakha Peng Electric mei lutlai U Maung Ohn nih, “Ramkomh sin in ca cu a phan cang ko rua. Keimah sin belte ah phungluut in a phan rih lo. Asinain, Ramkomh Cozah nih tuah ding a ti mi cu kan tawlrel thiamthiam ding a si ko. April thla dih in meter kan rel lai. Sipuazi lei le pawcawmnak rian ah mei a hmang mi tu cu a man an pek ko lai. Chungkhar ca bak ah unit 150 tang a hmang mi lawnglawng kha man pek lo a si lai,” tiah The Hakha Post ah a chim.
Hi bawmhnak kong hi Daw Aung San Suu Kyi sin ah mizapi nih COVID-19 lockdown ruang ah nifatin tangka luut a ngei lo mi hna le mei man thumh ding kong an hal mi kha Ramkomh Cozah nih a lungtlinpi i an tawlrel cuahmah mi a si, tiah kan theih.
