2020 kum thimnak ah kaa zuam ti lonak hi a ruang tampi a um ko nain a ngaingai cu, Ramkomh (Pyidaungsu) Cozah nakin Ramkulh (Pyine) party hruaitu si ka duh deuh ca ah a si, tiah atulio Hluttaw Speaker Pu Zo Bawi nih The Hakha Post ah a chim.
“2020 kum thimnak ah kaa zuam than lonak hi a ngaingai cu, kan party nih Chin Ramkulh chung ah teinak kan hmuh khawh ding hi a biapi tuk mi a si ca ah keimah hrimhrim nih biatak chuah ka duh. Cun, Ramkomh Cozah nakin Ramkulh ah party hruaitu si kha ka duh deuh. Phundang cun, Ramkomh nakin Ramkulh ah rian ka tuan khawh deuh lai, ka ti ca ah thimnak ah kaa timh than lonak a si,” tiah The Hakha Post ah a fianter.
Pu Zo Bawi cu Chin Ramkulh NLD party Chairman le atulio Hluttaw Speaker a tuan lio mi a si i 2020 kum thimnak ah Ramkulh meehmun No.2 in zuam aa tim nain aa leet than. Amah hmun ah atulio Chin Ramkulh Cozah Upadi Lutlai (Advocate General) Pu Sonny Thang Cung aa zuam lai, tiah kan theih.