Aralai mi 2020 kum thimnak ah kaa zuam than lai, teinak zong ka hmuh fawn lai, Ramkomh Cozah nih budget a kan pek mi tlukruannak a um khawh nakhnga kaa cuh than lai, tiah USDP Cozah chan (2010-2015) ah Chin Ramkulh Cozah Chief Minister a rak tuan mi Pu Hung Ngai nih July 13 ah a chim.
2015 kum donghlei ah ka ngandamnak a thatlo ca ah kaa thim ti lai lo na ti. Atu hi naa tim than si kaw, teinak hmuh cu naa zum ko maw, tiah kan hal mi he pehtlai in atu bantuk in a kan leh hi a si.
“Riantuan ka duh than ca ah kaa zuam lai. Rian fakpi tuan zuam ding lo ahcun zuam sawhsawh in kaa zuam hnga. Asinain, zuam taktak in kaa zuam lai ca ah teinak ka hmuh hrimhrim lai ka tinak a si. Amah belte, kaa zuam nakding hmun tu hi pakhatnak papek mi cu, Pyithu Hluttaw Palai, pahnihnak ah Pyine (Ramkulh) Hluttaw Palai le pathumnak ah Amyotha (Miphun) Palai tiin kaa cuh lai. Cuh than ka duhnak bik a ruang cu, kan miphun le rammi nih Ramkomh Cozah nih budget a thlak mi hi Pengtlang aa buaktlak lo tuk. Pengtlang kip kan buai tuk. Cucaah, rammi ca ah chimrel khawh ding hi biapi ah ka chiah,” tiah Pu Hung Ngai nih The Hakha Post ah a chim.
Pu Hung Ngai cu U Thein Sein Cozah chan ah Chin Ramkulh Cozah Chief Minister rank in 2010-2015 kum tiang rian a rak tuan mi a si. Minung cu tlamtlin dih a um lo ca ah an rak soisel ngai nain cheukhat nih cun, Pu Hung Ngai kan ngai ruangmang, tiah an chim ceih lio ah atu bantuk in 2020 kum thimnak ah teinak hmu ding in kaa zuam lai, a hun ti than cang.
