October 29 thawk incun, ramkhel party hna nih mee pek sawmnak le party thazang hmuhsaknak tuah tikah minung 50 cung a luan a si ahcun palek nih mibu thencheunak tuah in phungning in dantatnak tuah a si cang lai tiah rampi president zung nih thanhnak a tuah.
Hi kong he pehpar in Chin ramkulh election chairman Pu Uk Nawl nih a tang lei bantuk in a chim.
“Mipi caah minung 30 le party hna nih mee pek sawmnak le party thazang hmuhsaknak tuah tik ah minung 50 tiang hi cohlan a si. Hi thanhnak tuah mi cu Myanmar ram chung kip ah a nung cang, phung lonh ahcun dantatnak tuah a si cang ko lai.
Nain thanhnak ca bal cu kannih sin ah zei ca hmanh a pha lo. Kan thei lo, kannih election committee nih tuanvo lakmi a si lo” tiah Pu Uk Nawl (Chin ramkulh Election chairman) nih The Hakha Post ah a chim.
