Nawlngeihnak chuttu SAC Ramchung Minister hlun Lt. General Soe Htut cu ziknawh a ei ti in SAC Ralkap Biaceih Zung nih thong kum 5 tlak ding in hremnak a pek tiah SAC nih a thanh.
Lt. General Soe Htut nih Ramchung Minister a rak tuan lio ah, Passport tuahnak kongkau ah ningcang lo in nawlngeihnak a hman i ziknawh a ei tiah an ti. Cun Ramchung Minister Zung tangka tawlrel ning kongkau ah ningcang lo in rian a tuan tiah an ti.
Cu case he aa pehtlai mi mi dang zong civil lei biaceih zung ah siseh, SAC kuttang palek zung in tuanvo ngeitu hna cu palek zulhphung in siseh biaceih an si lai ti zong an thanh.
Lt. General Soe Htut cu Min Aung Hlaing nih a zumh ngai mi le aa bochan ngai mi pakhat a rak si i, nawlngeihnak chuttu ralkap council ah Deputy Prime Minister rank tiang a rak tlai mi a si. Ko Phyo Zayar Thaw le Ko Jimmy tel in ramkheel thongtla pawl thah ding ah a biapi in tlangtlatu zong a rak si tiah theih a si.
SAC chungtel a rak si mi Lt. General Moe Myint Tun le ralbawi ngan Brigadier Yan Naung Soe zong ziknawh an ei ti in anmah SAC lila nih tu kum October thla ah thong kum 20 tlak ding hremnak a rak pek hna.
