2020 January thla in June thla tiang, Myanmar ram chung kahdohnak ruang ah ngakchia a thi mi dihlak minung 43 an si i, minung 103 pumtlinglo ah an i chuah tiah UNICEF nih cathanh a chuah.
2020 kum i ngakchia thimi le pumtlinglo ah aa chuah mi hna hi 2018 le 2019 he tahchunh ahcun mithmuh kuttawngh in a karh ca ah lungrethei ngai cu a si ko tiah UNICEF nih a thanh mi chung ah aa tel.
2020 January in September thla tiang, vawlei phum mi bomb puah hnawhnak in ngakchia a thi mi hi minung 13 an um i, ngakchia minung 56 nih faak taktak in hliam an tuar tiah theih a si.
Myanmar ralkap le Rakhine ralkap AA hriamtlai phu an i kahnak Rakhine ram le Chinram chung ah ngakchia a thi mi, hliam a tuar mi le pumtlinglo ah aa chuah mi an tam cem tiah theih a si.
Chin Ramkulh chung i a thimi hna kong he pehtlai in Salai Kyaw Aung nih, “Tukum chung ah Chin Ramkulh chung in a thi mi zong an tam ngai. A thi mi hna chung ah ngakchia zong tampi an i tel ve. Ngakchia a thi mi zat hi fiang in cun ka thei kho lo nain, a tam cu an tam pah. A tam deuh hi cu bomb puah hnawh ruang ah a thi mi an tam,” tiah The Hakha Post ah a chim.
2020 November 18 zong ahkhan Rakhine ram chung ah vawlei phum mi bomb a puak i ngakchia pakhat le a nulepa a hmun ah an nunnak a liam. Cun, minung pali hna zong fak tak in hliam an tuar i Rakhine ram Sittwe sii-inn ah an chiah hna tiah theih a si.
Ngakchia hna an him nakhnga ca ah Myanmar ram chung ah a cang mi kahdohnak chung i aa tel mi hriamtlai phu hna nih an hmanh a puak rih lomi bomb pawl le hriamnam pawl hrawhpiak dih ding in UNICEF nih nawlhalnak cathanh a chuahchap tiah theih a si.
Photo/ The Hakha Post
