Myanmar ram ah a rak tlawngmi Tuluk ramleng vuanci Wang Yi cu rialdip uktu ṭhing U Than Shwe nih Myanmar ram daihnak ca ah bawmhnak pek ding in a hal, tiah theih a si.
Nizaan August 14 ah U Than Shwe le Wang Yi tonnak an ngei i cu tonank ah cun ‘Myanmar ram daihnak kong ah Tuluk sin in bawmhnak kan hmuh lai tiin kan i ruahchan’ tiah U Than Shwe nih bawmh a hal hi a si.
Myanmar ramchung thil sining kong ah ramleng lei in ahohmanh nih rak i thlak lo ding in Wang Yi nih a chim i, Myanmar ram ṭhanchonak le daihnak a hrawkhraltu buaibainak pawl Tuluk nih a duh lonak kong zong a chim chih, tiah Tuluk Embassy cachuahmi ah an langhter.
Nizaan August 14 ah Wang Yi cu Myanmar ram ah a rak tlawng i SAC ralkap bawizik Min Aung Hlaing he zong tonnak a ngei.
Min Aung Hlaing he tonnak an ngeih lio ah Shanram chaklei ah a cangmi kahdohnak hi Tuluk nih kan duh lo tiah Wang Yi nih a chim i, SAC nih tuah a timhmi Myanmar ram thimnak kong ah Tuluk nih bawmhnak pek ding zong in a chim, tiah theih a si.
