Ralkap nih nawlngeihnak hramhram in an lak hnu, tlangcung hriamtlai le SAC kar kahdohnak a chuahnak hmun hna ah nu 100 leng cu SAC ralkap nih hraamhraam in an tlaihhrem hna tiah Women’s League of Burma (WLB) nih an langhter.
WLB nih cazin an langhter ning ah kum 2021 February in 2023 July thla tiang Sagaing ramthen, Chin ramkulh, Shan ramkulh le Karen ramkulh ah tlaihhremnak a tam khun tiah theih a si.
Cheukhat peng hna ah cun phone line, Internet lin a ngah lo caah atu langhter mi cazin nak hin a tam deuh kho. Hihi hngalh khawh vial lawng lak mi a si. Hmun cheukhat ah cun Internet a ngah lo nak zong a um i hngalh lo mi tampi a um lai ti a fiang ko, ti zong an langhter.
Hi hlan zong ah SAC ralkap nih hi bantuk thil hi an tuah tawn i, nawlngeihnak laak a si hnu ah hin a zual khun. A luancia 2021 November thlachung ah Chin ramkulh, Tedim peng ah nau ngeika nu pakhat le naupawi lio nu pakhat cu SAC ralkap nih a changchang in an rak tlaihhrem hna. 2022 July thla zongah Sagaing ramthen, Pale peng ah SAC ralkap nih nu pahnih an rak tlaihhrem hna i an thah beh hna.
SAC ralkap nih nu cung ah an tuahser mi tlaihhremnak pawl a rannak in ngol ding in July 14 UN Security Council meeting ah Myanmar ram palai U Kyaw Moe Tun nih a rak chim.
SAC ralkap pawl nih ralhmai an nam tikah nu tlaihhrem hi hriamnam pakhat bantuk in an hman tawn i kahdohnak a cannak hmuh ah hin tlaihhremnak hi a tam khun tiah BWU nih June 17 report ah an rak langhter.
Photo: DMG
