Myanmar ram buainak ruang ah Chinram chung ah harnak a tongmi Chinmi pawl cu International Committee for Red Cross (ICRC) nih bawmhnak pek ding in timhtuhank a ngei, tiah theih a si.
ICRC Chiarman Mirjana Spoljari cu September 5 in 9 tiang Myanmar ram ah a rak tlawng i, ram buai ruang ah harnak a tongmi Chin, Kachin, Rakhine, Shan, Karen le Karenni hna ah bawmhnak pek ding in ICRC nih khuakhannak a ngeih hi a si.
“Myanmar rammi tampi cu thlopbulnak sii-ai ngei loin le eidin tirawl harsa ngaiin khua an sak pin ah dinti thiang le a thianghlimmi zun-inn lei zong ah chambau in an um. Rian a har caah minung tampi ca ah khuasaknak lam a pit,” tiah ICRC nih September 10 a langhter.
Chinram tel in Myanmar ramchung hmun tampi ah ahlanken in kham khawh a simi zawtnak pawl an tlung i, sii-ai bawmhnak le ṭha tein tlopbulnak tuahpiak ahcun hinakhin a faak chinchin kho, tiah ICRC nih a langhter chap.
SAC nih Myanmar ram uknak an laak thawk in nihin ni tiang ah Chinmi 250,000 hrawng cu ralzaam dirhmun in an um hna i, Mizoram le Chinram chung khuate pawl ah an i dor hna, tiah theih a si.
