Chin Ramkulh, Paletwa khuapi chung ah COVID-19 mizaw minung pali hmuh a si ca ah IDP camp ah a ummi ralzaam hna siseh, khuami hna siseh, sii-inn lei ah rian a tuan mi hna siseh lungrethei in an um tiah theih a si.
Myanmar ram huap COVID-19 zawtnak chonhbarhnak a karh kho ding dirhmun a si tiin Ngandamnak zung nih ralrin a pek lio ah atu bantuk in Paletwa ah minung pali zawtnak an hmuh hi a si.
Paletwa i mizaw pali hna kong he pehtlai in sii-inn uk Dr. Soe Thet Win nih, “Atu zawtnak hmuh mi hna hi Yangon in a rak tlung mi an si. Yangon in a rak tlungti mi hi an dihlak ah minung 7 an si. An dihlak in COVID-19 kan chek hna i pali sin ah hmuh a si. Zawtnak a langhter mi sining an ngeih ruang ah chek an si lo,” tiah The Hakha Post ah a chim.
Thanchonak a nuar i, lamsul lei harnak a tong mi Paletwa ah zawtnak hmuh hi a voi khatnak a si. Khuami hna nih lungretheih cem mi hi ralzaam hna sin ah zawtnak chonhbarhnak a chuak sual lai ti hi a si.
Ralzaam hna kong he pehtlai in khuami U Tin Oo nih, “Khuami le ralzaam hna ca ah lungrethei ngai cu a si. A bik in ralzaam ca ah hin lungre a thei khun mi a si. Aruang cu ralzaam hna sin ah a chuah sual a si ahcun, zei ti hmanh in i runven khawh a si lai lo. Camp chung ah pe 6 dan in ho hmanh um khawh a si lo. Naih tete in an um dih cio, cun ralzaam cu ngandamnak lei ah thinphang a si fawn,” tiah The Hakha Post ah a chim.
Atu bantuk in Paletwa ah COVID-19 mizaw hmuh an si cang ca ah ralzaam lei tuanvo ngeitu hna nih siseh, khuapi i tuanvo ngeitu hna nih siseh leeng ah chuah lo ding in nawl an chuah tiah theih a si. Kahdohnak ruang ah Paletwa Peng chung lawng ah ralzaam aa dor mi minung thonghra leeng an um tiah kan theih.
Photo/ Hakha Post
