Mizoram ah a phan mi Myanmar ralzaam hna le ramdangmi hna nih India rammi nih a ngeih mi sinak i ngeih khawh a si lo tiah Aizawl District biaceih bawi nih theihternak ca a chuah tiah theih a si.
India rammi lawng nih ngeih khawh a si mi Voter ID, Aadhar Card, Birth Certificate, Tribal Certificate le Residential Certificate cu Mizoram ah aa dor mi Myanmar ralzaam hna le ramdangmi hna nih i ngeih khawh a si lo tiah Aizawl District biaceih bawi Pu Lalhriatpuia nih March 13 ah theihternak a tuah hi a si.
Mizoram ah a phan mi Myanmar ralzaam hna nih India rammi sinak ID pawl phungning loin an i ngeih hna ti mi thawngpang a chuah hnu ah Young Mizo Association (YMA) nih Mizoram cozah sin ah theihternak a tuah i cu hnu ah cun Aizawl biaceih bawi nih atu bantuk hin ca a chuah hi a si.
SAC nih Myanmar ram uknak hramhram in a laak hnu ah Mizoram ah a zaam mi Myanmar ralzaam hi 70,000 hrawng an si lai, tiah ralzaam bawmchantu bu hna sin in theih a si.
