Mizoram ah aa dormi ralzaam hna bawmhchanh khawh an si nakhnga Mizoram ah UNICEF zung honpiak ding in Mizoram aiawh in Upper House of India ah MP a simi Pu K. Vanlalvena nih halnak a tuah, tiah thawng kan theih.
Pu K. Vanlalvena cu US ram, Maryland ah a tuahmi Chin Kumthar (Tho) ah khuallian dirhmun in an sawm i, ṭuanvo ngeitu upa hna he tonnak ah atu bantuk hin halnak a tuah hi a si.
Chin Association of Maryland hruaitu hna le Pu K. Vanlalvena nih US ramleng vuanci zung i East Asia, South East Asia and Pacific region zohkhenhtu Erin Kimsey cu October 28 ah an ton i, Mizoram ah UNICEF zung honpiak ding in Pu K. Vanlalvena nih halnak a tuah.
Mizoram ah Myanmar lei in, Bangladesh lei in le Manipur lei in ralzaam tampi an lut i ralzaam hna nih fimcawnnak, ngandamnak le eidin tirawl lei ah har tampi a tong, tiah Pu K. Vanlalvena nih Erin Kimsey sin ah a chim.
Ralzaam bawmhchannak lei ah Mizoram cozah zong nih harnak tampi a ton caah ralzaam pawl ṭha tein bawmhchanh khawh an si nakhnga Mizoram ah a rianrannak in UNICEF zung kan honpiak u, tiah Pu K. Vanlalvena nih halnak a tuah.
Pu K. Vanlalvena nih Erin Kimsey cu Washington D.C. ah a vung ton i cu tonnak ah cun Chin Association of Maryland hruaitu hna Pu Zo Tum Hmung le Rev. Tim Seinna zong an i tel ve, tiah thawng kan theih.
#TheHakhaPost
