SAC ralkap nih rammi ralkap tlaknak upadi a nunter hnu in Tedim peng chung ah hram a bunh mi PDF-Zoland ah mino 100 leng an lut, tiah PDF-Zoland chimnak nawlngei Ko Tony nih a chim.
Cu mino 100 leng chung ah cun zatuak in 20% hi nu an si i, 80% hi pa an si. Hmunhma lei in zoh ahcun Kalay in a rak lut thar mi an tam bik tiah a chim.
“Ralkap thar a rak lut mi an tam caah deu thar zong sak an hau i, kedan, angki, hriamnam le eidin tirawl tibantuk zong kan herh ngaingai,” tiah Ko Tony nih a chim.
CNO/CNDF sin zong ah Kalay peng chung in mino tampi an lut tiah theih a si i, milu zeizah ngaingai an si ti mi bel an chim lo.
CDF-Kanpalet, CDF-Mindat, CDF-Mara, CDF-KKG, PDF-Zoland, CDF-CDM-Sinyin le CDF-Asho zong ah mino an lut thar mi an um len hna.
CNF/CNA zong nih rammi ralkap tlaknak upadi nih a huap mi mino pawl dohthlennak ah i tel ding in forhfialnak a tuah.
SAC ralkap nih a nunter mi rammi ralkap tlaknak upadi nih a huap mi Myanmar ram mino hi 2019 Myanmar milu cazin ning ah cun 13 million (Ting za le ting sawmthum) an um. Cu chung ah cun pa hi 6.3 million an si i, nu hi 7.7 million an si.
Atu kum Thingyan dih in SAC ralkap nih ralkap thar training pek hram thawk ding in timhtuahnak a ngei i, voi khat training pek ah minung 5,000 in le kum khat ah minung 50,000 in 60,000 tiang ralkap thar hmuh ding in timhtuahnak a ngei, tiah theih a si.
