SAC ralkap nih February 10 ah rammi ralkap tlaknak upadi a tharchuah hnu in Hakha khua ah ramdang kalnak passport aa tuah mi an karh, tiah khuami nih an chim.
“Passport zung an rak khar i an on ṭhan hnu khan cun passport aa tuah mi an tlawm tuk cang. Asinain, ralkap tlaknak upadi an thanh hnu in passport a tuah mi hi nitin in 100 in 200 karlak an si ṭhan,” tiah khuami pakhat nih Zalen ah a chim.
Passport a tuah ve mi minung pakhat nih, “Ramdang kal khawh a si te lai le si te lai lo cu ka thei lo. A herh sual ah tiah tuah khawh a si lio ah kaa tuah ve ko. Baitak chim ko ahcun ralkap ṭuan cu ka huam bak lo. Cucahcun, hrial khawh nakding ah a lam kip in i zuam a hau ko,” tiah a chim.
SAC ralkap nih a tharchuah mi Myanmar rammi ralkap tlaknak upadi ning ah cun kum 18 in kum 35 karlak (pa), kum 18 in kum 27 karlak (nu) le kum 18 in kum 45 karlak (thiamnak ngei) pohpoh a tlawm bik kum 2 in a tam bik kum 5 tiang duh zong duh lo zong ah ralkap tlak ding a si.
Tukum Thingyan dih, June thla thawk in SAC ralkap nih ralkap thar training tuah a timh i, voi khat ah minung 5,000 in training pek a timh, tiah theih a si.
