2020 kum Myanmar ram thimnak ah Chin National League For Democracy party (CNLD) in aa zuam mi Hluttaw Candidate hna chung ah pahnih cu ralkap nih anmah he riantuanti ding in an sawm hna nain an cohlang hna lo tiah theih a si.
An sawm mi hna hi Matupi Peng Ramkulh Hluttaw No.1 ah aa zuam mi Pu Ngai Sak le Hakha Peng Ramkulh Hluttaw No.2 ah aa zuam mi Pu Siang Mang hna an si. Pu Siang Mang hi ralkap nih an sawm ning ahcun, “Chin State Administration Council Chairman tuan ding” an sawm mi a si.
Pu Siang Mang nih, “Ka cohlan hna lonak hi cuti pipa in a ruang a um lo. Mizapi nih duh mi Cozah, mizapi nih duhmi ukhruainak tang lawng ah riantuan ding hi keimah pumpak in biakhiahnak ka tuah zungzal mi a si. Hihi kaa timh peng mi, ka saduhthah zong a si fawn. Cun, kei hi atu naite tuah mi thimnak ah CNLD in mizapi nih thimmi ka si ve tik ah, mizapi duh lomi Cozah mizapi duh lomi ukhruainak ahcun ka tuan kho lo hrimhrim. A si kho lo hrimhrim tiah atu hi ka cohlan hna lonak a ruang bik cu a si ko,” tiah The Hakha Post ah a chim.
Ralkap nih a ser mi Cozah Chin State Administration Council Chairman ca ah an thimmi Pu Terrance San Mawi Ni Khuai cu lungzawtnak in February 11 ah a thi i, amah rian an khinhmi Chairman hmun aiawh tu ding nihin tiang an hmu rih lo. Cun, amah aiawh ding in rian an khinhmi hna zong nih an cohlang rih hna lo tiah kan theih.
Ralkap nih anmah he riantuanti ding in Chinmi an sawm mi hna chung ah USDP Cozah chan i sakremhnak lei minister a rak tuan mi Pu Ngun San Aung le Chin Ramkulh Ta-ya-Hluttaw Lutlai a tuan mi Pu Terrance San Mawi Ni Khuai lawng nih an cohlan rih.
