Ralkap Hluttaw Palai hi atulio zatuak 25% hi 50% ah chap ding in USDP party nih Hluttaw meeting ah ceihmainak an ngei.
Phunghram ahran Remhthantu Phu nih an chuahpi mi cu July 31 ah Hluttaw Palai 17 nih an ceihmai chung i Ralkap Hluttaw Palai chap ding in USDP nih ceihmainak a tuah hi a si.
NLD nih phunghram remh ding ahran chuahpi mi ah, Ralkap Hluttaw Palai zorter ding le Rakhine National Party tel in party cheukhat cu i tel hrimhrim lo ding, ti aa tel. “Ralkap Hluttaw Palai zorter ding cu a si kho lo mi a si. Atu zatuak 25% hi 50% ah kaiter ding hmanh a si,” tiah USDP Hluttaw Palai U Maung Myint nih a chim.
Ralkap Palai 78 nih phunghram ahran chuahpi mi ceihmai ding ah min cazin an pek mi zong an leet than. Minung 21 nih thawk in ceihmai ding a si nain minung 17 lawng an chuah ca ah a chuak lo mi nih caan dang la in an ceihmai than tel ai. Hi ceihmainak ah USDP Palai hna nih phunghram Dal 12nak he aa ralkah mi a si, an ti lio ah NLD le Palai dang cheukhat nih cun lungtlinnak lei in an ceihmai ve.
Hi meeting ah USDP Palai U Sai Kyaw Moe nih, “Hiti phunghram remh ding chuahpi mi hi phunghram tlaihreh timh maw a si, asiloah tuah hramhram mi dah a si,” tiah biahalnak a tuah. Cucu, NLD Palai U Aung Kyi Nyunt nih phu khat le phu khat i hnursuannak biahalnak a si a ti i Pyidaungsu Hluttaw Speaker (Na-za-ka) U T. Khun Myat nih a hnon.
Rakhine National Party Hluttaw Palai U Ba Sein nih, “Phunghram remh ding ahran chuahpi mi hi 3000 leng a si tik ah a thar in tial mi bantuk a si. Ralkap le NLD i ceih ulaw a tha lai,” tiah duhlonak a chim ve.
Phunghram ahran remh ding in chuahpi mi 3765 lak ah Rakhine National Party nih 858 an chuahpi i Hluttaw ah Ralkap i tel ti lo ding a chuahpitu an si. Shan National League for Democracy nih ahran 1112 an chuahpi ve. NLD nih rampi sernak phunghram dahlo a dang pohpoh ah remh, chap le hlonh ding tiin an chuahpi ve. (Ref: RFA)
