Chin Ramkulh State Administration Council chungtel si ding in ralkap council lei sawmnak cu 2020 kum Myanmar ram thimnak ah Paletwa Peng CNLD in aa zuammi le Minister hlun Pu Kyaw Nyein nih a cohlan tiah theih a si.
Pu Kyaw Nyein nih, “Council chung ah riantuan ding in ka cohlan hna. Ka cohlan hnanak a ruang zong hi thanchonak lei ah a khulfum bakmi ka khua ka ram a si mi Paletwa hi rianh ka duh. Ka si khawhnak lam in rianh ka duh. Atu hi Hakha zong ka phan cang. Paletwa hi cu mizapi nih kan hmuh, nan hmuh cio bantuk in thanchonak lei i a khulfum lawng si lo, kahdohnak zong a chuahnak hmun a si. Zeidah hmaithlak in ka tuan hmasa lai timi cu ka chim rih lai lo. Tuan ding tampi kaa timhmi a um,” tiah The Hakha Post ah a chim.
Pu Kyaw Nyein hi President Thein Sein chan lio ah Thingram le vawleitang chuak kilhimnak minister a rak tuan bal. Anih hi a hlan ahcun CPP party ah Vice Chairman, KACC ah Vice Chairman zong a rak tuan bal.
Cun, 2020 kum Myanmar ram thimnak ah Chin National League For Democracy party in Paletwa Peng, Pyithu Hluttaw meehmun ah aa zuam nain, teinak a hmu lo tiah theih a si.
