SAC ralkap ah a tla mi pohpoh cu thlahlawh sing 5 MMK leng telh in eidin le a dangdang kong ah nuam te in chiah nan si lai, tiah SAC nih lemsoinak a tuah, tiah theih a si.
Yangon ramthen, Mandalay ramthen, Irrawaddy ramthen le Naypyidaw ah ralkap tlaknak kong he pehtlai in SAC nih nihin March 14 ah khuanu khuapa an ton hna i, ralkap a tla mi mino pawl cu a zeilei poh ah tlamtling te in kan chiah hna lai ti in lemsoinak bia an chim, tiah tonnak ah aa tel mi hna nih Khit Thit Media ah an chim.
Ralkap a tla mi pawl cu thla khat sing 5 MMK leng thlahlawh pek an si lai, fimthiamnak zong cawnpiak an si lai, eidin tirawl zong tha te in pek an si lai i nuam te in kan chiah hna lai an ti, tiah tonnak a kal mi hna nih an chim.
“Nihin chun ah khan meeting a kan auh i ralkap a tla mi cu thlahlawh 510,000 MMK pek ding an ti. Taang 10 a aung cang mi cu Degree an hmuh tiang ca kan cawnter hna lai, ralbawi si ding in kan tunmer hna lai, ralram ah kan kua hna lai lo, nan lungrethei hlah u a kan ti,” tiah meetiang a kai mi pakhat nih a chim.
A voi khatnak ralkap training a kai ding mi hna mizacin cu nihin March 14 ah chuahpi ding in SAC nih ramkulh le ramthen uknak lei zung pawl nawl an pek hna, tiah Khit Thit Media nih a langhter.
