Myanmar ramchung ah SAC ralkap nih sunghnak a hun ton thluahmah caah raldohnak lei ah bawmhnak pek ding in USDP Chairman nih Russia sin ah bawmh a hal, tiah theih a si.
Russia cozah thawngzamhnak Sputnik nih USDP Chairman U Khin Yi cu biaruahnak a ngeih i cu lio ah cun U Khin Yi nih a cunglei bantuk in bawmhnak a hal hi a si.
Atulio Myanmar ramchung i buaibainak hi ralhrang cawlcanghnak phun khat ah Russia nih chiah sehlaw Myanmar ram ah ralhrang doh ding in Russia ralkap pawl an i tel kho lai tiin U Khin Yi nih a chim, tiah Sputnik thawngzamhnak nih a ṭial.
U Khin Yi nih, “Kan ram sining taktak hi Russia nih a theihthiam nakhnga le Russia sin in bawmhnak kan hmuh nakhnga hal kan duh ko. Kannih USDP cu ramkhel party kan si bantuk in ralhrang dohkalhnak lei ah United Russia Party he kan ṭuan ṭi lai,” tiah a chim.
SAC nih Myanmar ram uknak a laak hnu ah Russia nih Min Aung Hlaing cu an ram ah tlawn ding in voi 2 tiang a sawm cang i, vawleicung ram vialte lak ah Russia lawnglawng hi Min Aung Hlaing a sawmtu a si rih.
