Rakhine ram, Ann Peng, Minbia Peng, le Mepung Peng chung ah a um i Pathian rian a tuanmi pastor hna cu kahdohnak ruang le COVID-19 ruang ah eidin lei le a dangdang ah harnak an tong tiah theih a si.
Harnak a tong mi pastor hna ca ah Hakha khuachung zong ah bawmh halnak zong ngeih an timh tiah theih a si.
Bawmhnak an hal ding kong he pehtlai in Rev. U Kyaw Hlaing nih, “Rakhine ralkap AA hriamtlai phu le Myanmar ram Cozah ralkap karlak kahdohnak ruang ah siseh, COVID-19 zawtnak ruang ah siseh Chin pastor le Chin miphun hna eidin lei le a dangdang ah harnak an tong. Atu bantuk in harnak an ton hi caan zong a sau ngai cang. A bik in an ton mi hi eidin lei ah a si. Cun, COVID-19 zawtnak ruang ah lamsul lei phihkhar le state at home timi nawl an chuah ca ah zei rian hmanh an tuan kho lo. Hi bantuk thil nih a phak hna ca ah Khrih ah pumkhat a si mi unau hna nih bawm cio hram hna usih tiah kan sawm hna. Na kut rak kan samhpi ve,” tiah The Hakha Post ah a chim.
Harnak a tong mi hna ca ah, Rev. Kyaw Hlaing tawlrelnak in Hakha, Thantlang le Chin Baptist Convention hna sin ah bawmhnak an hal hna nain, nihin tiang thawng an let rih hna lo tiah theih a si.
