Rakhine ram ah, Chin Affairs Minister mee hmun ah Chin mi mee a pe kho mi minung 70,607 an um tiah Rakhine ram Election Commission, Secretary U Thu Rein Htun sin in kan theih.
Rakhine ram, Pengkip ah mee a pe kho mi hna hi Ann Peng ah minung 21,503, Minbia Peng ah 17,755, Mepung ah 10,850, Taungkuk Peng ah 7971, Thantuai Peng ah 4184, Sittwe Peng ah 2220, Myouh Oo Peng ah 2539, Guah Peng ah 2196, Rambe Peng ah 1169, Manaung Peng ah 892, Kyouhdaw Peng ah 111, Kyouhphyo Peng ah 714, Rathehtaung Peng ah 353, Buthidawng ah 144, Maungdaw Peng ah 82, Pungnagyoun ah 14 an si tiah kan theih.
U Thu Rein Htun nih, “Rakhine ram hi mizapi nih nan theih cio bantuk in ram a dai kho rih lo. Kahdohnak a chuah tawn lengmang ca ah mee cazin kan tar khawh lonak hmun zong a um pah rih. Rakhine ram chung ah Peng 33 kan um. Hi chung ah Chinmi hi Peng 16 chung ah an um ve,” tiah The Hakha Post ah a chim.
2015 kum thimnak lio i Rakhine ram chung Chinmi mee a pe kho mi cazin hi an dihlak ah minung 62,343 an si tiah kan theih.
2020 kum party tling thimnak i Rakhine ram Chin Affairs Minister ca ah Ashoe Chin National Party, Chin National Party, Chin National League For Democracy Party, NLD Party, USDP Party le UDP party hna in Hluttaw Palai minung 6 an i zuam lai tiah kan theih.
