Central Young Lai Association nih Lawngtlai in Rakhine lei thilphorh a phih hnu ah Lawngtlai ah thilphor motor 100 leng an i hreng, tiah theih a si.
Rakhine ramkulh, Kyaukdaw khuami chawletthaltu pakhat nih, “Ruah lo piin lam an phih tik ah zeihmanh kan tuah manh lo. Kan thilri vialte lawngtlai ah an taang dih. A taang mi kan thilri pawl chuahpinak nawl kan pe ko u tiah kan nawl hna nain a kan onh lo,” tiah a chim.
Rakhine hriamtlai AA sin ah thilri a phak lo nakhnga CYLA nih June 24 thawk in Lawngtlai-Paletwa lampi a phih i nitin zantin in conghnak le zohfelnak an tuah.
“Eidtin tirawl le Petrol/Diesel a phor lo mi motor le tilawng pawl cu luhchuahnak nawl pek an si ko. Asinain, zeidah an phorh timi cheknak tha tein tuah a si,” Paletwa tualchungmi pakhat nih a chim.
Lawngtlai-Paletwa lampi hi KMMTTP lam tiah a tawinak in an auh i acozah nih phungning in a onmi a si rih lo nain ram hnih mizapi pehtlaihnak a that nakhnga theihthiamnak in rak hon chung mi a si.
AA nih Chinram ah ral mei a kau lawng si lo in Chinmi le Chinmi karlak ah kahdohnak chuahter ding in rian a tuan caah atu bantuk hin CYLA nih Lawngtlai-Paletwa lam a phihnak hi a si.
AA nih Chinram ah buaibainak a chuahpimi a ngol lawng ah le Chinram in a chuah lawng ah hi lam hi kan hon tthan lai, tiah CYLA nih a chim.
