COVID-19 hi zeitindah aa thok?
COVID-19 zawtnak cu Tuluk ram Wuhan rili tirawl (Seafood) zuarnak in aa thawk. Hi market ah hin thiahhlei-zuu (marmots), vaate (birds), saveh (rabbits), palaak/papalaak (bats), ruul (snakes), nga (fish) tibantuk a nung in zuar mi le thahcia in zuar mi sa kha phungluut loin an zuar. COVID-19 hi saram in minung sin ah a kai mi zawtnak a si. Saram sa lak hmanh ah a bik in palaak sin in zawtnak zatuak 96% a um ti a si.
Cucaah, 2020 January 1 ah khan Wuhan market pohpoh thianhhlimhnak an tuah nain COVID-19 cu a rak karh manh cang. Cucaah, WHO Western Pacific Office nih 2020 January 21 ah minung sin ah a phan cang, tiah an fehter. Aa thok ning an tial ning aa dang cio. Cheukhat nih an tial ning ahcun, Tuluk ram Wuhan ah hin Coronavirus le Ebola hlathlai nakding ah sehzung pakhat an sak. Hihi raltuknak hriamnaam ca ah a thli tein an zuat mi hna an si i an karh thluahmah.
Hi sehzung le Wuhan khua hi meng 20 lawng aa hlat i sehzung in dat khu a chuak. Cucu market sa zuar mi ah a luutcolh, tiah Israel thiamsang nih an chim. Vawlei cung ah tihnung bik hriamnaam hna cu Nuclear bomb, Atom bomb or Hydrogen bomb hi an si. Cu nakin tihnung deuh mi cu Chemical weapon ti mi dat hriamnaam thalo le Biology weapon ti mi hrik thalo hriamnaam an si. Hi hriamnaam khu cu dawp sual ahcun thihcolh a si pin ah tlangrai phunphun a chuahpi khawh. Cucu Tuluk nih a thli in a ser i an ser lio ah a hrik a karh i sii-ai ca ah kan ser mi a si, tiah mizapi sin ah Tuluk Cozah nih hlennak bia an chim. Hi COVID-19 hi a ngai- ngai cu Wuhan market saram le sa sin a kai hlan ah sehzung an sak mi dat khu a rak zuang diam cang.
Hi sehzung hi 2013 kum lio ah tender an auh i an sak, 2014 kum ah an lim. Hi sehzung sak nakding ah USD 44 million an dih i France ram thiamsang zong nih a sak an rak bawmh hna. 2017 kum ah UN nih thil thalo a si, ngol u, tiah ralrin a pek nain Tuluk nih sii-ai ca ah kan ser mi a si, tiah an i pheh rih. A fawinak in chim ahcun hriamnaam sernaklei thiamsang hna nih palaak (bat) kha hmang in hriamnaam an ser i cu nih cun saram dang a va chawnh hna i minung sin tiang a phanhnak a si.
WHO nih COVID-19 tiah a min a thlen
World Health Organization (WHO) nih phungluut in COVID-19 tiah a min a thlen cang. “COVID-19 tiah min an thlen mi cu Co nih Coronavirus sullam a ngei i, vi nih virus ti mi sullam a ngeihter. Cun, d cu disease ti mi zawtnak min a tawinak ah hman a si i 19 ti mi cu hi zawtnak hi 2019 kum ah hmuh mi a si ca ah kan thlen mi a si, WHO Director General Tedros Adhanom Ghebreyesus nih a chim.
COVID-19 ti mi cu zeidah a si?
COVID-19 ti mi cu saram sin in aa thawk i minung sin ah a kai mi zawtnak a si. Hi virus hi a kihnak hmun ah a tomtom in an karh kho. COVID-19 zawtnak theih khawhnak bik cu “Thawchuah har ngai in a um i thazaang a dih mi kha computer nih rianrang tein a hngalh khawh mi” (Severe Acute Respiratory Syndrome) a si. Cun, cuap phin, taangfah, le khuh (pneumonia and bronchitis) ti mi in a lang tawn. Hi zawtnak hi kum upa cang mi hna sin ah a thazaang a thawng khun i a thi mi tam deuh zong kum upa an si.
Zeitindah kan i runven lai?
Hi zawtnak a ngei mi an um sual ahcun amah he pe 6’x7’ (2 meters) aa hlatnak ah na um lai. Minutes 15 cung na um lai lo. Hathio le khuh tik ah kaa i huh le tissue hman peng ding. Kut thiang tein atuletu i tawl ding. Takpum lum tein umter ding. Taksa tawnghnak (i hnurtaatnak) in i chawnh khawh a si. Thir dat a ngei mi ah suimilaam 12 chung a nung kho. Thilpuan cung ah suimilaam 9 chung a nung kho. Kut (zapei cung) ah minutes 10 a nung kho. Cucaah, hmurhuh (mask) nakin a tha deuh mi cu; kut thiang tein i tawl lengmang.
Hnipuan le thilpuan pohpoh nitlang ah pho lengmang. Kut tawlnak spirit i chiah peng le hman peng ding. Tilum caanhmaan in din peng ding. Virus pohpoh nih nilin a celh lo ca ah nitlang toh lengmang ding. Phundang cun, lum tein um ding. Virus nih a kik mi a duh ca ah vurtlang in tuah mi haangthlum (aaye) pawl din lo ding. Tilum le cite in kamthuah (haa tawl) peng ding,” tiah a thanh. Hihi zeibantuk tlangrai pohpoh ca zong ah ahlankan ralrinnak tha bik a si, tiah siibawi thiamsang nih an chim lengmang cio mi a si. Zeitindah ralrinnak kan tuah lai, zeitindah kan i ralrin lai, tibantuk kha Chin Ramkulh Ngandamnak Zung nih fimchimh cawnpiaknak zong a tuah lengmang cang. Zeibantuk zawtnak pohpoh hi ahlankan ralrinnak tuahnak nih tampi a khamh, tiah siibawi thiamsang hna chim mi hi zulh khawh i zuam cio usih!
(Ref: Matt Reynolds tial mi, Sarah Newey le Anne Gulland tial mi, Saya Rung Kaw tial mi, Thatin-kabar, Wikipedia le Daily newspapers cheukhat)
