Sagaing ramṭhen chung ah a um mi Pyosawhṭi khua pali nih PDF bu fonh sin ah hriam an chiah, tiah NUG runvennak zung nih thawng a chuah.
PDF sin ah hriam a chia mi Pyosawhṭi khua 4 cu Sagaing ramṭhen, Humalin peng ah a um mi Kyunkung khua, Tawngtwat khua, Inkyinmaw khua le Manawthar khua hna hi an si.
A cunglei khuate pali in SAC ralkap hnuzul Pyosawhṭi milu 120 hrawng nih PDF sin ah hriam an chiah i, an i tlaih mi meithal phuntling zun 130 zong PDF kut ah an ap.
A cunglei khua 4 chung ah hin Tawngtwat khua hi Pyosawhṭi an rak ṭhawn ngainak khua a si i, atu bantuk in hriam an chiah caah teinak nganpi pakhat a si, tiah PDF ṭuanvo ngeitu upa pakhat nih a chim.
