Pyidawngsu Minister Dr. Win Myat Aye cu Chin Ramkulh ah ra in Tedim i volunteer a tuan mi minung 59, Khaikam in minung 11 le Tedim in bawmtu phu a si mi phu 7, Khaikam in phu 1 hna cu 2020 July 15 ah roca le tangbenh peknak a ngei tiah thawng kan theih.
Hi kong he pehtlai in Tedim khuapi volunteer hruaitu Saya CS Mung nih, “Tedim i Volunteer minung 59, Khaikam in minung 11 le bawmtu phu hna cu July 15 ni ah amah Pyidawngsu Minister pum i langh in roca le tangbenh an kan pek. Cun, Facility Quarantine ah a ummi nau pawi pawl tangka bawmhnak le case No.318 ca ah bawmhnak thilri tlawmpal a pek,” tiah The Hakha Post ah a chim.
Chin Ramkulh chung ah COVID-19 zawtnak in a zaw mi minung 11 an si i, minung 10 cu damnak an hmuh than cang ca ah sii-inn in an chuahter dih cang hna. Case No.318 hi Tedim sii-inn ah an chiah. Myanmar ram chung 2020 July 16 suimilaam 8:00AM tiang ah zawtnak ngei minung 337, damnak a hmu than mi minung 266, sii-inn in chuahter cang mi minung 253, zawtnak in a thi mi minung 6 le zohchung mi mizaw minung 6400 an si tiah kan theih.
