Myanmar ram Vice President-2 a rak zul ve mi Pyidaungsu Hotel le Khualtlawn Thanchoternak Committee nih Thantlang khua ah hotel lian pakhat sakpiak ding a timh, khuami a hmun rak zoh chung ding in bia an cah hna.
“Hotel lian mi pakhat sakpiak ding in an kan timh. A hmun zoh ding zong in bia an kan cahtak. Kanmah khuami tu nih hin a hmun thim hna kan i palh te hnga dek maw, a hmun le a vawlei hna a tlamtlin cun sakpiak ding cu kan zumh ngai, kan hnabeisei ngai ko,” tiah TBC Church Chairman Pu Lawm Bik nih The Hakha Post ah a chim.
Thantlang khua ah hotel lian pakhat sak ding ahcun a herh mi khual zohkhenh ningcang, chumhchuan ningcang le hotel lei he aa pehtlai mi rian a cawng ding mi minung an um lai maw, a tuan kho ding minung an um lai maw ti le zei bantuk khualtlung a si zong ah a chawnbia kho ding riantuantu an um lai maw, ti mi zong ceihmai a si, tiah kan theih.
Myanmar ram Vice President-2 bawmhnak in Khuallian Riahnak inn pakhat zong sak lim cang a si i tutan ah hotel lian pakhat sak than ding in timh mi cu a tlamtling lai, tiah khuami nih an hnabei a sei ngai. The Hakha Post
