Pyidaungsu Fimcawnnak Minister taanghra camipuai phi mi zohfel ding ah Hakha a phan

Myanmar ram Fimcawnnak Zung Minister Dr. Myo Thein Gyi cu taanghra camipuai a phi mi zohfel ding ah March 14 ah Hakha a phan i March 15 ah a kir than cang, tiah Minister pakhat sin in March 15 ah thawng kan theih.
“Tutan a tlun hi a voi 4nak a si cang. Anih hi Chin Ramkulh a kan zawnruah ngaingai tiah ka ruah. Voi 4 khengte Chinram Hakha a phan cang. Taanghra camipuai a phi mi zong a zoh hna. Tutan a kan tlawn cu Hakha College le B.E.H.S. No. 1/3 zong a zoh. B.E.H.S. No. 1 sianginn pakhat khi a thing tuk cang i dot hnih sang in rak sa u, kan bawmh hna lai, a kan ti,” tiah Chin Ramkulh Social Affairs Minister Pu Pau Lun Min Thang nih The Hakha Post ah a chim.
“Tutan a rak kan tlawn i bia a kan kamh mi kaa lunghmuih ngai mi cu, Falam sianginn-then le Hakha Dawrthar Sang sianginn-then cu sianginn tling (B.E.H.S.) ah a kan cohlanpiak i cucu kaa lawmh ngai mi a si,” tiah a cunglei Minister nih a chimchap.