Pyidaungsu Electric Zung in U San Htun Oo (Letthoh Hngunhmu) hruainak in tuanvo ngei upa paruk nih Hakha in meng 15 a hlatnak Lichia khuataw Bawinu kham i mei laak nakding February 5 in zoh hram an thawk.
“Atu hi a hmun ah hlathlainak (survey) an tuah cuahmah lio a si. February 5 in an thawk cang. An zoh dih in tuah awk a tha lai maw, meitha zeitluk dah a chuak lai i khua zeizat dah a pek khawh lai, zeitin dah tuan ning ding a si lai, ti mi an hmuhning kha Chin Ramkulh Cozah le Ramkomh Cozah ah ca an tial te lai,” tiah hi mei laak nakding hmun rak timhlamh thawknak ah aa tel mi Pu Ral Kham nih The Hakha Post ah a chim.
“Nihin ah Hakha cu khualipi a si bantuk in Ma Ha Dat A Line lawng hi i rinh awk a si lo, kan khuaram i a um mi laak khawh mi meitha kha kan laak i kan hmanchih a herh, tiah kan ruah ca ah Hakha Khuanu Khuapa nih kan timhlamhnak a si,” tiah Pa Ral Kham nih a chimchap.
Hika meitha laaknak kong hi Hakha Khuanu Khuapa tawlrelnak in Japan JICA company nih 2013 March ah an rak zoh. Cun Kowei company nih 2014 May ah an rak zoh cang mi a si. Japan JICA nih an rak zoh ning ah cun ‘thaal ah Megawatt 3, fuur ah 10 Megawatt a chuah khawh lai,’ an rak ti.
Hi hmun meitha laaknak kong hi Hakha Khuanu Khuapa nih Chin Ramkulh Cozah hlun Chief Minister Pu Hung Ngai sin ah siseh, nihin Cozah chan ah Hakha a rak phan mi Vice President 1 le 2 an pahnih sin ah tuahpiak ding in an hal ca ah tutan Pyidaungsu Electric Zung upa nih an rak zohnak hi a si. Cu hlan cu Company nih voi hnih an rak zoh i tutan a voi thumnak hi cozah nih an rak zoh mi hi a si. The Hakha Post
