Kum 18 a tling mi poh ralkap tlak dih ding in SAC nih upadi a chuah hnu in Bago ramthen, Pyay khua ah chungkhar cazin an check i min cazin an laak tiah theih a si.
SAC ralkap, Peng Uknak Zung, Immigration le Sang Uknak Zung riantuan pawl i bawm in February 12 thawk in cazin an khawm tiah theih a si.
Khuami pakhat nih, “Kan inn ah pa pathum kan um. Ka fa upa deuh a min an khumh. A hniang pa cu a kum a tlin rih lo caah a min an khumh lo. Cazin ah min khumh kan si caah zei tuah awk kan hngal rih lo. Ralkap tlak lo nakding pakhatkhat cu tuah a hau, ” tiah DVB ah a chim.
Rikhiah a tlinh mi pawl min cazin an laak. Training thawk tikah kan in auh hna lai, a ra lo mi cu thong kum 5 tlak khawhnak upadi in warrant chuah le dantat nan si lai tiah an chim i, training kai ni tu cu an chim lo tiah an ti.
SAC nih ralkap tlaknak upadi a ferter hnu suimilaam 24 chung ah Sagaing peng chung ah khual tlawng mino 40 leng cu SAC ralkap nih hramhram in an tlaih hna. Yangon khua chung hmun cheukhat, Mandalay khua chung, Myeik khua chung le hmun dangdang zong ah SAC ralkap nih mino pawl an tlaih hna tiah ramchung media nih an langhter.
Hmanthlak: Social Media (SAC nih chungkhar cazin an chek lio)
