Hakha ah Pupa ramngei hna nih Chin Ramkulh Cozah Lutlai pathum tel in duhlonak caang 16 au in lamzawh timh mi kong ah, Minister Pu Sui Thio nih, “An zawh ve ko lai, upadi ning in kan rian kan pehzulh ve ko lai,” tiah July 29 ah a chim.
“Min thlir (by-named) in an kan sawhkhih mi hi a ruah awk ka hngal lo. Sang thar samh kong ah hin committee pathum ah then a si. Sang thar hmun sawhkhihtu ah Minister Pu Soe Htet hi Chairman a si. Hmun ngei hna he a tha bik in pehtlaihnak le cuti deuh, khati deuh in tiah tlangtlatu Chairman ah Khuanu Khuapa in Pu Ral Kham a si. Kei hi Upadi ning in tawlrel a si cang mi kha anih hi hmun a tingco ding ah aa tlak maw, tiin zohfeltu le hmun petu ah Chairman ka si. Hi lamzawhnak kong ah minbik (minthlir) in an timh mi hi a ruah awk ka hngal lo. Asinain, zawh ko hna seh, a phung a si ko. Amah belte, upadi lonh in thil an tuah sual ahcun upadi nih a zulhdawi ve ko hna lai,” tiah Minister Pu Sui Thio nih The Hakha Post ah a chim.
Lamzawh ding kong he pehtlai in Chin Ramkulh Cozah Lamsuul Minister Pu Sui Thio nih a chimchap mi cu, “Hi Sang thar samh than ding mi hi upadi lonh in kan timh mi a si lo. Upadi ning tein kan tuah lai i Hakha khua ah hin milu kan karh i innlo kan karh khawh nakding hi kan saduhthah bik mi cu a si ko. Cun, Sipin area ah upadi lonh in inn sak cu Sipin upadi ning tein tawlrel a hau ko. Atu hi vawlei sawhkhih hmanh aa lim rih lo. Upadi ning tein kan tawlrel lio a si. Hi lio ah atu bantuk in lamzawh an timh hi a si i a ruah awk ka hngal lo ngai,” tiah a chimchap.###
