ZAPI AW
Khuahlan Chin kan pupa chan ahcun Far, Thing, Dii, Mau le rua in inn an sak. Thlalang awng zong um loin mui padap lak ah hrin mi an rak si. Siseh an thinlung cu a ceu, a thiang, an nunphung a thiang, a tha, an tluangtlam,khat le khat zawn an i ruat, thlachiat an ruat, an ral a tha i Pathian duh ningin an rak nung. Sertu Pathian kha rak hngal hnasehlaw Pathian sin an phan dih hnga.
Sihmanhsehlaw nihin ah sertu, khamhtu, zungzal nung mi Pathian kan zum ko nain, pakhat te hmanh taang loin Pathian sin kan phan lai lo. A ruang cu Pathain duh mi poh kan huat, kan hlawt ca ah Pathian thawngtha kha thawng chia a lo cang. Pakhat le pakhat i daw u ti mi kha, kan hmuh bal lo mi tiangin kan huat cang hna. Na innpa nangmah bantuk in na dawt hna lai ti mi Jesuh bia cah kha, Amah Bawi Jesuh a um lo, kan hmu lo ti in, innpa chim lo lam hla pi minung he hmanh kan i hua cang. Kan pupa chan ahcun khua chingchan le tluang dang tiang hmanh an i daw i Chinram an rak runven. Myanmar, Mirang, Japan zong an rak doh hna. Hriamnam tha zong an tih hlei lo.
Zei tluk mifel hmanh zung chung lenkai duh loin inn lawng te ah lenkai a duh mi nih cun hriamnam tha chim hlah company a tuah mi nuhmei hmanh an tih ko hna lai. A ral a chia ko lai. Hakha khua hi a lamkip in thangcho seh tiah saduh kan that cio ; College, sianghleirun a phunphun kan hmaika ah a vun i hun thup hi ruat ve hmanh! zan mang ko a hluan. Hakha dawhtertu zung kip, sianginn kip ah hin pei hmunhma kan ngei cio lai i kan fanau le an kai cio ne lai cu! Inn thong tampi lawng khi pei Khualipi ti a si cu! Ka inn, ka lo hmun ti lengmang ahcun hi vialte inn lo thatha pawl hi limhaang an ngei lai lo. Ka khua ka ram le keimah ta a si dih ti mi lungput kan ngeih cio lawng ah kan khua kan ram, kan minung tiang in kan thangcho lai.
Tuanvo ngeitu hna nih Town planning an suai mi leng ah, Tar planning zong hi kan suai chap piak ulaw ti kan duh. Chinmi kan nunphung ah Inn ngeih hi kan duh bik mi a si. Thihloh tik kan ruak suannak tal ah ti khi a si. Kum 2018 ah Inn hmun ka sok bal nain ka hmu lo. Kum 2009 June 9 in Hakha ka rak um mi kha, Kum 2015 July in aa tial tik ah ka sok kho ti lo. Cucaah tuanvo ngeitu nih tutan inn hmun a sok kho mi hi kum 10 a um cang mi si loin a kum thumhpiak deuh hna u tiah ruahnak ka vun chuah. Kum 70 ring lo ka si cang nain ka lung a dong lo.”Ka thih hnu tal ahcun inn hmun hmete tal cu ka thlarau an rak ka pekpiak te ko lai” ti hi a si. Kei tu cu ka sok ti lo ca ah atu lio inn hmun a sok mi poh hi tuanvo ngeitu nih, nehsawh zomhteih, neekrawk in an um hnawh sual hoi hna lai ti ka ruah ah ka lung a nuam lo. Pupa ram ngeitu le tuanvo ngeitu karlak ah lung karlak mai pum tenh bang in, inn hmun a soktu pawl cu thinphang le dide ngai in khua kan sa ko hih.
By : Sayaci Lian Thar (Rtd)
Biakilh: “Zapi aw” hi The Hakha Post dirhmun si lo in catialtu pumpaak dirhmun le ruahnak an si.”
