Chin Ramkulh Minister a rak si hmasa mi Pu Vum Tu Maung milem le pangpar dum honnak le Pathian sin pekchanhnak cu 2020 February 24 Mindat khua ah Chin Ramkulh Chief Minister Pu Salai Lian Luai nih honnak a tuah tiah kan theih.
“Hi pangpar dum hi 3 acre a kau i Pu Vum Tu Maung milem hi Mindat khua luh lai hauka ah kan chiah.Chin miphun lak ah tuanbia tha a kan tialpiaktu kan hruaitu tha hi kanmah mino lawng si loin kan fanau hna zong nih thei zungzal hna seh, an lung ah cam zungzal seh. Amah zoh in an thinlung tha thawnter in ram dawtnak lungput ngei hna seh ti saduhthah in kan tuah mi a si,” tiah Vum Tu Maung milem tuahsernakding i tawlreltu Salai Ki Sein nih The Hakha Post ah a chim.
Pu Vum Tu Maung milem le pangpar dum khua mi hna tangka chuahnak in a liamcia kum 2019 December 1 in Winner Company nih an rak thok. Cozah nih a chuah ding mi tangka a chuah dih hnu ah khua tangka an rak hman mi an cham than lai tiah theih a si.
Pu Vum Tu Maung hi kum 1900 April thla ah Pu Thang Pet le Pi Law Mang Yawng nih Mindat peng Wantu khua ah an rak hrin mi a si. British le Japan ral lio ah Takhin Aung Maung tiah a min a rak thang. Cun, Chin ram a hmasa bik Minister zong a rak si.
