Myanmar ram Vice President Pu Henry Van Thio nih, “Hakha Sangthar samh mi hi inn 1000 in rak samh than u,” tiah ca a kan kuat tiin Chin Ramkulh Hluttaw Chairman Pu Zo Bawi nih March 5, The Hakha Post ah a chim.
Hi kong ah Chin Ramkulh Cozah, Hluttaw, Committee hna le Khuanu Khuapa hna tuanvo pek an si bantuk in Khuanu Khuapa Pu Siang Mang nih, “Hihi rianrang tein kan ceih ding mi a si. Hluttaw Chairman Pu Zo Bawi nih a kan auh i kan ceih. Amah belte, Hakha khua hi ram le hmunhma tampi a ngei mi kan si ko i hmun dangdang ah hmunthar hi samh ko usih, ti zong kan chim tik ah cu zong cu ceih than thiamthiam a hau mi a si,” tiah Hakha Khuanu Khuapa Chairman Pu Siang Mang nih The Hakha Post ah a chim.
“Atu Sangthar samh mi pawng i inn hmun thar samh than ding hi innhmun le pupa ram kong ah a buai mi an tam tuk i cu nakin Cawbuk lei, Nawi chak, Falam lam le Dawrhlun hrawnghrang ah hmun tampi kan ngeih ko ca ah hihi biatak tein ceih than a hau mi a si. Hi kong ah khuami mizapi zong Town Hall ah auh in tonbiaruahnak kan tuahpi hna lai kan fehter te lai,” tiah a cunglei upa nih a chimchap.
Hi Sangthar samh cuahmah mi le a thar samh timh mi hi 2017 kum January thla thawk in tawlrel a si cang nain nihin tiang tlam a tling kho lo. Cucaah, Myanmar ram Vice President Pu Henry Van Thio nih inn hlang le inn ngei lo nih innhmun an ngeih ve i duhdim tein an um khawh nakding tha tein rak tawlrelpiak hna u, tiah Chin Ramkulh Cozah le hi kong ah tuanvo ngeitu bia a cah hna, tiah kan theih.
