Chin Ramkulh, Paletwa ralzaam le kokek harong ca ah Pi Ngun Thluai Cin Ishikawa Co., Ltd. nih tangka Kyats sing 103 bawmhnak a pek i July 15 Chin Ramkulh Cozah Zung ah Chin Cozah nih bawmhnak pek mi cohlannak an tuah.
Cu hmun ah bawmhnak a petu Pi Ngun Thluai Cin nih, “Paletwa ralzaam pawl sining le kokek hartong pawl an sining pawl online i an post mi ka hmuh tik ah kan lung a nuam lo tuk. Zeiti tal in ka bawmh kho hna hnga maw, ti mi ka ruat. Kan pa he kan i ceihmai hnu ah hi bantuk in bawmhnak kan pek mi hi a si,” tiah Pi Ngun Thuai Cin nih a chim.
Pi Ngun Thlai Cin i pasal hi Japan Miphun a si i Japan ah fa pahnih he khua a sa mi an si. Asinain, Pi Ngun Thluai Cin hi Myanmar ram ah rian a rak tuan lengmang mi a si, tiah kan theih.
“Hmailei zong ah kan bawmh khawhtawk ding thil kongkau a si ahcun bawmh ding in timhcia peng kan si. Kan bawmh khawhnak leikap ah i tel kan duh peng,” tiah Pi Ngun Thluai Cin nih a chimchap.
Paletwa ralzaam le kokek hartong bawmhnak pek mi kong ah Chin Ramkulh Planning and Finance Minister Pu Vui Kaw nih, “Chin Ramkulh Cozah kan i lawm tuk. Hartong le ralzaam hna ca ah tampi thathnemnak a pek lai. Pi Ngun Thluai Cin nih Chinram bawmh na duhnak kong na chim mi cung zong ah kan i lawm tuk. Bawmhchawnh awk a herh mi a um ahcun kan in chimh ko lai. Ti khawhtawk in bawmh ding ah timhcia peng kan si, tiin na chim mi cung ah kan lunglawmhnak a ngan tuk hringhran,” tiah a chim.
Chin Ramkulh Paletwa ralzaam ca ah, Hakha, Falam, Tedim le a dangdang khua ah bawmhnak zeimawtzat zong khua chung innkip ah kal in an hal hna i bawmhnak tangka zeimawzat zong a um. Chin Ramkulh Cozah le Pyidaungsu Cozah nih bawmhnak an rak pek ve hna, tiah kan theih.
