Bago ramthen, Phyu peng, Nyaung Pin Tha khua Palek Sakhan cu nihin December 13, zinglei suimilaam 4:15 in rammi ralkap phu komh nih an kah i 5:00 hrawng ah an laak khawh tiah Royal Peacock Column nih a thanh.
Cu palek sakhan laak kahdohnak ah cun SAC lei 30 leng an thi, Rammi rungvengtu ralkap phu komh nih hriamnam kuanzen tampi an laak khawh i Palek Sakhan cu mei in an khangh tiah theih a si.
Kahdohnak ah rammi ralkap phu komh nih SAC hriamnam G2 zun 1, G3 zun 2, shotgun zun 4, BA 94 zun 2, MA-13 zun 1, Tear Gas Gun zun 2, RPG bomb thei 21, RPG zen 17, 60MM bomb thei 27, 9MM zenthong 80, kut cheh bomb 6, G3 zenthong 231, 5.56 zenthong 143, laptop 1, kuan kham angki zun 2, kuan bawm 6 le a dang kuanzen tampi an laak khawh tiah an langhter.
Nyaung Pin Tha Palek Sakhan cu Yangon-Mandalay lam hlun ah a um mi a si i, palek 60 hrawng nih an hngah mi a si. Kahdohnak ah palek 30 hrawng an thi i a taang mi cu an zaam tiah cathanh ah an tial.
Cu kahdohnak cu KNLA, Royal Peacock Column, Yoma Column-1 le BPLA nih an tuah mi a si tiah kan theih.
Photo: Royal Peacock Column
