2020 thimnak kong he pehtlai in Ramkulh Cozah ser khawhnak phunghram 261 an remh lo zong ah CNLD nih Chin Ramkulh Cozah kan ser khawhnak lam a um ko, kan ser fawn lai, tiah Pu No Than Kap nih July 31 ah a chim.
“Ka chim ngamnak a ruang a um. A lam zong a um. 2020 thimnak ah CNLD kan thawng lai. Hluttaw Palai tam bik kan si lai ca ah rampi President thimnak ah kanmah vote a biapi ve lai. President ca ah vote an kan hal lai i kannih nih Chin Ramkulh Cozah ser khawhnak nawl kan hal ve hna lai. Phundang in kan chim ahcun Chief Minister le Minister dang dirhmun zong kan tlaih ve lai. A biapi mi cu Chin miphun kan dihlak nih Chin party ah kan i fun i thazaang kan pek a herh,” tiah CNLD Chairman Pu No Than Kap nih The Hakha Post ah a chim.
Hi kong ah Pu No Than Kap nih a chimchap mi cu, “Party hme tete, Chin party hna va luh cu zeipi an tuan kho lai lo, an ti men lai. Upadi tang ah kan i khat dih. Party hme e, party ngan e, ti a um lo, kan i khat dih ko. Cozah kan tlaih khawh tuk ve ko. Chinmi nih Chin party i kan i fun khawh ahcun Shan le Kawl bantuk in Cozah kan tlaih khawh ve ko,” tiah a chimchap.
Chin miphun nih kanmah ram kanmah tein kan sersiam khawh rih lo mi hi mizapi kan lung a fim cang i a ralai mi 2020 thimnak ah CNLD mee an pek lai. Teinak kan hmuh lai i Cozah kan ser lai. Chinmi nih Chin party ah i fun cang usih, ti zong a chimchap.###
