Kahdohnak a fahnak Karenni ramkulh, Phasaung khua chung ah aa hreng mi khuami 1,000 hrawng cu Karenni ralkap phu komh nih an chanhchuah hna tiah Karenni Zatlang Phu Komh nih nihin ah a langhter.
An chanhchuah mi hna chung ah a tam deuh cu phungki, ngakchia le nu an si i tar zong an i tel.
February 29 thawk in Phasaung khuapi chung SAC ralkap umnak hmun pawl cu Karenni ralkap phukomh nih an rak kah hna.
Cu hnu cun kahdohnak a faak i SAC nih vanlawng in bomb a thlak hna caah phungki inn pawl tel in khuami inn a za leng a kaang tiah an chim.
March 3 ah SAC nih vanlawng in bomb a thlak hna caah khuami ralzaam minung panga an thi i 20 hma an pu tiah theih a si.
“Atu tiang ah cun SAC lei nih miakpi le vanlawng in bomb an thlak cuah mah lio a si,” tiah Karenni Zatlang Phu Komh in tuanvo ngeitu nih PS media ah a chim.
Phasaung khua ah SAC ralkap battalion pahnih an um i cu chung ah LIB-135 cu Karenni ralkap nih an laak cang tiah thawng a thang nain phung ning thawngthanhnak a um rih lo.
2020 Ramkulh Cozah cazin ah cun Phasaung khua ah inn 393 le milu 3,401 an um tiah theih a si.
