Chin Ramkulh Paletwa Peng chung ah a ummi Cozah riantuan hna cu Pyidaugsu Cozah nih a hlan an thlahlawh nak tam let hnih pek ding in nawl a chuah.
Thlahlawh let hnih pek ding in nawl an chuah mi kong he pehtlai in Paletwa Peng, Fimcawnnak Zung Lutlai Pu Ki Law Ha nih, “Atu bantuk an kan pek mi hi Cozah lei nih pek awktlak a si. Atu Paletwa ah eidin lei ti awk tha loin a man an kai. Cun, atu a kan pek mi zong hi a tlawm hmanh a tlawm tuk tiah chim khawh a si. Cozah riantuan lawng si loin, lothlo hna zong minung tampi harnak an tong. Atu bantuk in Cozah riantuan pawl thlahlawh let hnih an kan pek mi hi kan i lawm taktak,” tiah The Hakha Post ah a chim.
Paletwa Peng chung i thil umtu ning he pehtlai in Cozah riantuan hna cu 2020 December thla in January, February, March thla tiang thlahlawh let hnih tiang pek ding le ngah ding in nawl an chuah mi ah aa tel.
Cun, Paletwa khuapi chung ah siangsangrun sianginn ca chim sayama pakhat nih, “Kan nih kan thlahlawh hi thlakhat ah sing hnih le thong sawmsarih le thong nga a si. Paletwa sining he zohchun ahcun kan thlahlawh hi a tlawm taktak. Asinain, atu bantuk in Cozah lei nih let hnih tiang an kan pek than ca ah kan i lawm tuk,” tiah The Hakha Post ah a chim.
Atu bantuk in thla li chung thlahlawh let hnih pek ding in nawl an chuah mi hi Cozah riantuan dihlak an i tel dih lai tiah theih a si. Paletwa Peng chung ahhin remdaihnak a um lo ca ah facang, eidin dangdang pawl a man ti awk tha loin a kai i, hi a man an kai mi zong RRCCI lei nih a man tum ding in an i zuam cuahmah tiah theih a si.
