SAC nih tuah a timhmi thimnak ca ah innchungkhar mincazin laak a bawmtu Non-CDM pawl cu a herh ning in dantat nan si lai, tiah PDF-Zoland le CDF-Hakha nih ralrin peknak ca an chuah.
SAC nih October thla thawk in Myanmar ramchung ah innchungkhar mincazin laaknak kan thawk lai tiah thawng an thanh i hmun cheukhat ah cun mincazin laak ningcang cawnpiaknak zong an tuah, tiah theih a si.
SAC hruainak in tuahmi innchungkhar mincazin laaknak ah a bawmtu Non-CDM pawl cu SAC ralkap bantuk in ruah nan si lai i, kan in kah cang hna lai tiah CDF-Hakha nih September 23 ah ralrin peknak a chuah cang.
PDF-Zoland zong nih “Innchungkhar mincazin laaknak ah SAC a bawmtu hna i an min pawl cu online zong in mizapi nih rak kan kua u,” tiah theihternak a tuah.
Innchungkhar mincazin laaknak ah zung rianṭuan pawl i tel lo ding in PDF-Zoland nih theihternak a tuah i, aa telmi pawl cu faakpi in dantatnak kan tuah hna lai, tiah ralrin peknak a chuah.
