Magwe ramthen, Myaing peng, Thayetkan khua palek sakhan cu PDF tangti phu komh nih nihin zinglei ah an kah hna i ralhraang lei an sungh deuh ca ah raltuknak helicopter in an rak bawmh hna tiah tualchung mi hna le tualchung thawmghram sin in kan theih.
Nihin zing suimilaam 3:00 ah Magwe ramthen, Pakokku pengkomh, Pauk peng le Myaing peng kar um Thayetkan palek sakhaan cu PDF tangti phu komh nih an kah hna. Thayetkan palek sakhaan ah hin ralhraang 200 hrawng an um i tual chung PDF hna he kahdohnak a rak chuak bal cang. Atu hi a voi hnihnak kahdohnak a si tiah Pakokku thawnghram nih a tarlangh.
“Nihin zing suimilaam 3:30 hrawng ah Thayetkan palek sakhan an kah hi a si. Atu zong an i kah lio a si ko. Kap hnih kar kahdohnak hi suimilaam 1 chung hrawng a si lai tiah ka ruah. Ralhraang lei nih seh meithal le hriamngan hna in an kah hna. Zing suimilaam 10:00 hrawng ah raltuknak helicopter in minutes 30 tluk hrawng a rak kah hna” tiah tual chung mi pakhat nih Yangon Khit Thit Media ah a chim.
Atu tiang ah kap hnih kar thi le hliam tuar thawngpang kan thei kho rih lo. PDF lei zong in thawngthanhnak an tuah rih lo tiah Khit Thit Media nih a langhter.
