May 2021 in January 2024 tiang ah PDF le Tlangcungmi hriamtlai bu hna nih SAC ralkap vanlawng pasarih tla lak in an kah cang, tiah theih a si.
Vanlawng tla lak in an kahnak hmunhma pawl cu Kachin ramkulh, Sagaing ramṭhen, Karenni/Kaya ramkulh, Shan ramkulh le Karen/Kayin ramkulh hna ah hin an si.
May 3, 2021 ah khan Kachin ramkulh, Momauk peng ah Kachin miphun hriamtlai KIA nih Mi-35 raltuknak Helicopter tla lak in an rak kah.
February 3, 2023 ah Sagaing ramṭhen, Shwepyiaye khua ah SAC ralkap Helicopter pakhat cu PDF nih tla lak in an rak kah. Asinain, Helicopter a rawk mi atu tiang an hmu rih lo.
June 30, 2023 ah Karenni ramkulh, Ywathit khua pawng ah KNPLF le ṭangrual hriamtlai bu hna nih SAC ralkap Fighter Jet (K-8W) pakhat tla lak in an rak kah. Vanlawng a rawk mi atu tiang an hmu ve lo.
November 2021 ah Karenni ramkulh chung ṭhiamṭhiam ah K-8W Fighter Jet pakhat cu KNDF Battalion (1) le Karenni Army nih tla lak in an rak kah.
Atu 2024, January thla chung ah hin SAC ralkap vanlawng pathum tiang tlangcungmi hriamtlai hna le PDF nih tla lak in an kah khawh hna.
January 3 ah Kachin ramkulh, Waimaw khua pawng ah SAC ralkap thilphurtu Helicopter (Mi-17) cu KIA nih tla lak in an rak kah.
January 16 zong ah Shan ramkulh, Kutkai peng ah SAC ralkap Fighter Jet (FTC 2000 G) cu KIA nih an rak tlak ṭhan.
Cun, nizaan January 29 ah Karen ramkulh, Myawaddy peng ah KNLA le PDF nih SAC ralkap Helicopter (Eurocopter AS 365 Dauphin) cu tla lak in an kah.
Vanlawng pasarih an thlak mi lak ah Sagaing ramṭhen ah an thlak mi pakhat le Karenni ramkulh ah an thlak mi pakhat hi atu tiang ah a tlaknak hmun an thei rih lo i, a rawk mi vanlawng thilri zong an hmu kho rih lo.
