Magwe ramthen, Pauk peng, Pyusawhtee khua a si mi Zipya khuate le cuka khua ah a um mi Palek Sakhan cu PDF nih an kah i SAC ralkap le PyusawHtee 32 an thi, PDF lei in 21 nih ram caah an nunnak an pek tiah Khit Thit Media nih a tial.
November 10 zanlei suimilaam 3:30 hrawng in Zipya khua le Palek Sakhan cu PDF nih an va fuh. Zanlei 5:50 hrawng ah SAC lei dronen nih a rak hel hna caah tla lak in an kah. An kah mi drone char ding in a ra mi SAC ralkap pawl cu PDF nih an kah hna i pahnih an thi, tiah theih a si.
November 10 in 14 tiang, ni nga chung pehtlai in PDF nih drone in rifle grenade bomb thei thong khat hrawng an thlak hna. Cu hnu ah SAC le Pyusawhtee pawl umnak an luh hnawh hna. November 15, zinglei suimilaam 5:00 ah Zipya Palek Sakhan le khua an luh hnawh i Zipya khua chung bunker hna le tlanglawng station bunker dihlak in an laak khawh.
Cu kahdohnak ah cun SAC ralkap, palek le pyusawhtee 32 an thi, tampi hma an pu. Mine panga le kutcheh bomb pariat zong an laak khawh tiah theih a si.
Kahdohnak chung ah SAC Mi-35 helicopter nih voi thum kah a rak bawmh hna. Kah-Pah-Sah 24 in SAC ralkap nih 120 MM miakpi in voi za leng a kah hna.
PDF nih an khua dihlak deng an laak khawh cang nain ralkap nih ruah lo pi in an rak kulh hna caah PDF 21 nunnak a liam i hriamnam cheukhat zong an sung tiah theih a si.
November 15, Zipya khua an kah lio ah Myaing khua SAC camp, Kanni pyusawhtee khua, Kaingtawmah Palek Sakhan, Twinmah Pyusawhtee camp, Thayetkan Pyusawhtee camp le Pakokku hrambunh Tatmah-101 zong hriam ngan le drone in an doh hna tiah theih a si.
Cu kahdohnak cu Myaing PDF B-1, B-2, Pauk LPDF, YRF (Pauk) Earthquake Defense Force, Taungngyo Dragon Force le Royal 7 nih an tuah mi a si tiah Yangon Khit Thit Media nih a tial.
