Magwe ramthen, Pauk peng, Kokekosu khua in pyusawhtee pakhat cu December 28 ah kut cheh bomb le zenthong he rammi rungvengtu ralkap sin ah a rak zaam tiah Myaing PDF sin in theih a si.
Pyusawhtee khua a si mi Kokekosu khua in pyusawhtee chungtel Nyein Zaw Min nih 5.56 zenthong 67, Carbine zenthong 30, AK zenthong 1, G3 zengthong 2, 4.8 zenthong 16 le kut cheh bomb pakhat a rak i ken i Myaing PDF sin ah a rak zaam tiah an thanh.
SAC ralkap pawl nih an hrem hna ruang, pyusawhtee hruaitu pawl nih an serhsat hna ruang le PDF pawl nih teinak an hun hmuh chin lengmang mi a hmuh tik ah, rammi zapi hremtu si a ning a zah caah PDF pawl a pehtlaih hna i a rak zaam. A rak zaam mi pyusawhtee Nyein Zaw Min cu tha tein kan zohkhenh tiah an tial.
Rammi sin ah i fonh a duh mi zei bantuk pyusawhtee, ralkap le palek poh lunglawm tein kan in don hna, nan nun himnak tuanvo kan laak i eidin kan in bawmh hna lai tiah Myaing PDF nih an thanh.
