2020 kum Myanmar ram thimnak ah i zuam kho ding in 2018-2020 kum tiang party thar a si mi ramkheel party 20 hna chung ah kawlrawn party thar pawl nih Hluttaw mee hmun pakhat hmanh ah teinak an hmu lo nain, Ramkulh hrambunh in dirhmi tlangcung party thar hna cu teinak an hmu.
Peoples Party (PP)
88 siangngakchia hruaitu U Ko Ko Gyi hruaimi PP party hi 2018 August thla ah party register an tuah i 2020 kum thimnak ah Hluttaw Candidate 140 an i zuam i pakhat hmanh teinak an hmu lo. Party Chairman a si mi U Ko Ko Gyi a mah zong aa zuam ko nain teinak a hmu ve lo.
United Betterment Party (UBP)
Pyithu Hluttaw Chairman a rak tuan bal mi U Thura Shwe Man nih a hruai mi UBP party hi 2020 kum thimnak zuam kho manh ding in dirhmi le kawlrawn hrambunh in dirhmi a si. Hi party hi 2019 April thla ah register an ngah i 2020 kum thimnak ah Hluttaw Candidate 920 an i zuam nain Hluttaw mee hmun hmun khat hmanh ah teinak an hmu lo.
People’s Pioneer Party (PPP)
NLD party in a chuak i, chawlehthalnak lei ah minthang a si mi Dr. Tet Tet Khaing nih a dirh mi party a si. PPP party hi 2019 October thla chung ah Register a ngah i tutan thimnak ah Hluttaw Candidate 230 in an zuam nain hmun khat hmanh ah teinak an hmu lo.
Arakan Front Party (AFP)
AFP party hi rampi doh ruang ah le rampi thurhnawmter ruang ah tiin kum 20 thongthlak a tong mi Dr. Aye Maung i dirhmi party a si. Cun, Rakhine National Party in a kuai mi zong an si. 2019 January thla ah register an ngah i, tutan thimnak ah Pyithu Hluttaw hmun khat le Ramkulh Hluttaw hmun hnih ah teinak an hmuh.
Kachin State People’s Party (KSPP)
Kachin Ramkheel Party cheukhat i fonh mi party KSPP zong hi 2019 June thla ah register an ngah i tutan thimnak ah Pyithu Hluttaw mee hmun pakhat le Ramkulh Hluttaw pathum ah teinak an hmuh.
Chin National League For Democracy (CNLD)
CNLD party hi Chin Party pathum fonh in dirhmi a si. 2019 July thla ah party register an ngah i tutan thimnak ah Hakha Peng, Ramkulh Hluttaw No.1 mee hmun pakhat ah teinak an hmuh ve.
Mon United Party (MUP)
Mon Party pahnih fonh in dirhmi MUP hi 2019 July thla ah register an ngah i 2020 kum thimnak ah Pyithu Hluttaw ah hmun hnih, Amyotha Hluttaw ah hmun 3, Ramkulh Hluttaw ah hmun 6, Affairs Minister hmun ah 1 teinak an hmuh.
2020 kum Myanmar party tling democracy thimnak ah NLD nih Hluttaw palai minung 920 in tam cem teinak an hmuh tiah theih a si.
