2020 kum Myanmar ram thimnak ah Falam Peng NLD Ramkulh No.2 in aa zuam ding mi atu lio Chin Ramkulh Chief Minister Pu Salai Lian nih tutan thimnak ah kaa zuam than lai, a pakhatnak ah ka chiah mi cu party nih teinak a hmuh ding hi a si tiah a chim.
Pu Salai Lian Luai hi 2015 kum Myanmar ram pumpi thimnak ah Falam Peng in teinak a hmu mi a si i, tutuan thimnak zong ah Falam Peng NLD in Ramkulh No.2 ah aa zuam than lai tiah thawng kan theih.
Aa zuam than ding kong he pehtlai in Pu Salai Lian Luai nih, “Tutan zong kaa zuam than lai. Zuam than kaa timh zong hi keimah pumpak ca lawng si loin kan party nih teinak a hmuhnak ding ca ah timi hi kaa tinh mi a si, a zuam zong kaa zuam fawn lai. Aruang cu, kan party nih teinak kan hmuh zong a herh. Khuaram thancho nakding ca ah tuah kan i timh mi pawl zong tling tein tuah kan herh. Kumpi kum nga chung ah kan tuahtuan mi pawl zong ai lim lomi tampi a um rih. Hi hna hi tling tein i lim lawlaw seh ti kan duh ko,” tiah The Hakha Post ah a chim.
Cun, teinak ka hmuhnak hmun le hma zong ah pehtlai tein ka kal tawn, mizapi he pehtlaihnak kan ngei i an herhbau mi pawl zong tuahpiak ka duh rih ko hna tiah a chim.
“Teinak ka hmnuhnak hmun ah ka tlawng tawn. Mee a ka petu mizapi he i chawnhbiak le i hmaitonh in bia i ruahnak hi ka ngei zungzal. Chin Ramkulh chung ahhin khawika hmun poh ah tuan a herh mi le tuah a herh mi hi hmun tampi ah a um. Keimah teinak ka hmuhnak hmun lawng hi tuahpiak le hmaithlak in tuanpiak awk a tha lo. Pengkip hi khawika zawn ahdah an herh bik timi zoh in kan tuahtuanpiak hna,” tiah CM Pu Salai Lian Luai nih a chimchap.
Cun, atu ah teinak ka hmuh a si cun ka ram le ka miphun ca ah tuah kaa timh rih mi pawl hi tuahpiak ding in timcia tein ka um zungzal tiah a chimchap.
