Paletwa peng chung in tilam le tlanglam khualtlawnnak cu Rakhine hriamtlai AA nih October 9 thawk in phihkhar hram an thawk, tiah thawng kan theih.
Khua khat le khua khat karlak i tlawnkai tik zong ah AA hriamtlai pawl hi ahlan nakin faak khun in checknak an tuah, tiah tualchungmi pakhat nih a chim.
“Zei ruang ah dah atu bantuk in AA nih lam an phih timi fiang in chim a har rih. Khua khat le khua karlak i tlawnkai tik zong ah checknak a tam ngaingai. Paletwa cu anmah nih an penmi hmunhma a si cang tik ah an duh poh in an tuah caah a si ko lai,” tiah a chim.
Atu bantuk in AA nih Paletwa peng chung ah zalong tein umkalnak nawl a phihkhar tik ah damlo ruang ah lakhruak in khualtlawn a duhmi hna nih harnak an tong ngaingai, tiah a chim chap.
Paletwa peng chung ah kahdohnak a um ti lo nain AA nih zalong tein umkalnak nawl an phihkhar pin ah tlaihkhihnak zong an tuah lengmang caah Mizoram lei ah a zaammi an um peng rih, tiah thawng kan theih.
