Chin Ramkulh Paletwa sii-innpi ah ramdang in a rak tlung mi minung 22 an um i, hi minung 22 chung ah 17 sii-inn ah ni 14 chung an hren hna hnu ah an chuah hna i minung 4 tu cu lunghrinh mi mizaw chiahnak ah an chiah rih hna tiah March 29 zaanlei ah kan theih.
“Paletwa Peng ah Tuluk ram in a rak tlung mi minung 18, Singapore in a rak tlung mi minung pathum le Qatar in a rak tlung mi minung 1, an dihlak ah minung 22 hna cu Paletwa sii-innpi ah an zohkhenh hna. Hi hna lak ah minung 17 hi Home Quarantine an chiah hna nak in ni 14 a tlin cang ca ah an chuahter hna i minung 4 tu hi cu an luhka ah an khuh, an cumpi, an taksa. Asinain, tuchun 2020 March 29 tiang ah an dam ngai i a rauhhlan ah an chuahter theu hna lai dah,” tiah Paletwa Penguk nih The Hakha Post ah a chim.
Paletwa hi AA le Cozah ralkap kahdohnak hmun a si ca ah Ramkomh Cozah lei nih Internet line an phih dih lawng si loin, lamsuul lei zong an phih dih ca ah khuami ei-din awk ngei loin a um mi an tam tiah kan theih.
“Atu sii-inn ah kan chiah mi hna hi tuchun (March 29) ahcun an dam tuk cang. Atu hnu ni thum-li hrawng an um rih a si ahcun kan chuahter cang hna lai. A fawinak in cun lunghrinh mi mizaw an sinak in an luat cang lai. COVID-19 i runvennak ca ah hmur huh (MASK), kuttawlnak (Handgel), taksa linh lei tahnak seh pawl hi kan herh bik mi a si. Hman chung ding cu kan ngei ko nain, a caan a rauh deuh tik ahcun kan ngei ti lai lo ca ah bawmhnak kan herh ko,” tiah a chimchap.
Vawlei cung ram dihlak a cuul dihtu COVID-19 in Myanmar ramchung ah minung 8 cu zawtnak hrik an ngei cang i pakhat hi Chin Ramkulh Tedim peng mi a si. Hi hna pali telh in Chinram chung ah lunghrinh mizaw pasarih an si cang.
