Chin Ramkulh Paletwa ah sianginn 118 ah siangcachim an bau i siangcachim bawmtu (Teaching Assistant) minung 360 June thla chung ah chiahpiak an si, tiah June 26 ah Chin Ramkulh Social Affairs Minister Zung in kan theih.
“Paletwa hi kan theih cio bang ralram an si tik ah siangcachim zapi cu an um zuam lo. Rian soktu zong an um lo i a umcia mi hmanh nih thialnak lawngte an kawl. Cucaah, siangcachim an bau i Pyidaungsu Fimcawnnak Minister he kan ruah tik ah Teaching Assistant hi anmah khuami rian pek siseh, kan ti. Thlahlawh in pek si loin nica in siangcachim bawmtu 360 rian pek an si. Hi hna chung hin caantling riantuantu zong thim an si te lai. Atu lio cu hitihin kan phihkhar chung ko,” tiah Chin Ramkulh Cozah Social Affairs Minister Pu Pau Lun Min Thang nih The Hakha Post ah a chim.
Paletwa hi Chin Ramkulh chung ah sifak bik Peng, AA hriamtlai le Cozah ralkap an i kahnak hmun pakhat a si. Siangcachim lawng si loin siangakchia zong an vaivuan i siangcachim pakhat hmanh an um lonak sianginn zong nihin tiang a um rih, tiah kan theih.###
