Lamsul lei phihkhar ruang ah le kahdohnak ruang ah eidin lei harnak a tong mi Chin Ramkulh, Paletwa Peng chung khuate khua nga chung i chungkhar hna sin ah hramhram in facang chungkhar khar khat ah tin hnih cio an hal hna tiah Chin Human Right Organization nih cathanh a chuah.
Facang hramhram in an chuh mi hna hi AA hriamtlai phu nih tin khat ah Ks.10,000 lawng an pek hna. Facang hi khuami hna nih Paletwa khuapi chung ah an cawk mi a si i, tin khat le cheu aa tlum mi tun khat ah Ks. 75,000 a si i, tin khat te lawng ah Ks. 50,000 fai a si tiah cathanh an chuah mi chung ah aa tel.
Hi kong he pehtlai in CHRO riantuan Salai Terah nih, “Ngasia khua tel in khua 5 chung, September 14 ahkhan a voi khatnak an hal. 2020 October 14 ni ahkhan a voi hnihnak an hal than hna. An hal hna zong ahhin chungkhar khat ah tin 2 cio an hal hna. An hal hna lawng si loin an sakhan tiang a phurhpiak tu ding khua khat ah minung 10 cio hramhram in an auh hna,” tiah The Hakha Post ah a chim.
Lamsul lei phihkhar a tong mi Paletwa Peng hi kahdohnak, Coronavirus zawtnak tih ruang ah facang eidin lei an har i, hi an harnak cu bawmchantu lei nih pek khawh ding, a thla in an tawlrel. Paletwa khuapi chung ah facang a phak ko bu zong ah cawknak tangka zong an ngei lo tiah theih a si. Cun, khuami pakhat nih, “Facang an hal hna nak hi a khua in khua 5 an si. An kan hal lawng si loin an kan halmi phurhpiak ding in khua khat ah minung 10 cio an kan auh,” tiah The Hakha Post ah a chim.
Atu AA hriamtlai phu nih facang an hal hna nak Ngasia khua hi Paletwa in suimilaam 5 tluk tilawng in kal a si i, a inn in inn 300 leng an si tiah kan theih.
Photo/ The Hakha Post
