Chin Ramkulh chung ah Myanmar cozah ralkap le AA hriamtlai phu kahdohnak ruang in harnak a tong i inn le lo, dum le hau chuah taak in a zaam mi Paletwa ralzaam hna an umnak hmun, khua le ram lei ah kir a duh mi an um ko nain, kirter than ding a si kho rih lo tiah Chin Ramkulh Cozah lei Chimphuannak Nawlngeitu Minister Pu Soe Htet sin in thawng kan theih.
“Paletwa Peng chung ah ralzaam camp hmun li ah a um. Ralzaam a taang mi zong an tampi rih. Ralzaam hna chung in an umnak khua le ram hmun pawl ah kir than a duh mi an um bantuk in a duh bak lo mi zong an um ve. Asinain, kan kirter rih hna lai lo. Aruang cu kahdohnak hi an ngol taktak lai le ngol taktak lai lo timi hohmanh nih kan chim kho lo. Cu lawng si loin, hmun kip ah bomb an hmanh tik ah khuami hna ca ah tihnung tuk a si,” tiah Minister Pu Soe Htet nih a chim.
Atu Paletwa Peng chung ahhin ralzaam aa dor mi dihlak Sami khuapi chung ah minung 3000 le Paletwa khuapi chung ah minung 5000 tluk an um tiah theih a si.
Cun, Minister Pu Soe Htet nih, “An umnak hmun, khua le ram cio ah kirter ding hi cu atu kan dirhmun ahcun a si kho rih lo. Aruang cu bomb an hmanh mi pawl zong hi tha tein zohfelnak va tuah dih i, a thiang cang ti hnu lawng ah kirter an si lai. Cun, an kir tik zong ah zei tindah an i cawm lai, zeidah an ei lai timi hi tuaktanpiak cia dih an hau. Chin Miphun cu mah le thazaang in aa cawm mi le a ei mi kan si ca ah atu ralzaam hna zong hi hiti camp ah um zungzal ding cu anmah zong an duh ve lai lo. Atu hnu thla khat hnih hrawng hi cu hngah a hau rih ko lai,” tiah a chimchap.
AA le Cozah ralkap hi Paletwa Peng chung kahdohnak an ngol hi thla thum fai a si cang. Cun, ralkap he zong remdaihnak ser ding in khuakhan lairelnak le biaruahnak voi khat an ngei cang.
